Minnismerki um Bobby Fischer

Hvað svo sem Bobby Fischer hefur sagt og verður sagt um hann, munu standa afrek hans í skákinni upp úr öllu öðru í framtíðinni af því sem hann hefur gert. Afrek hans og áhrif á skákina eru slík að þau verða ekki endurtekin í náinni framtíð ef nokkurn tíma.

Vinir Fischers hér á landi hafa unnið mikið og gott verk með því að koma honum til Íslands á sínum tíma. Spurning er hvort þeir væru ekki til í að setja endapunkt á sitt verk með því að heiðra minningu Fischers og reisa honum minnismerki í Reykjavík. Þetta gæti verið stytta eða merki af öðrum toga.

Reyndar ættu stjórnvöld að koma að því að koma á laggirnar alþjóðlegum skákskóla í Reykjavík og halda áfram á þeirri braut sem Taflfélagið Hrókurinn hefur lagt út á - sem í sjálfu sér er afar aðdáunarvert verkefni. Hér á Íslandi gæti því orðið til e.k. alþjóðleg skákmiðstöð, þar sem við gætum boðið til náms erlendum áhugamönnum ásamt því að halda hér alþjóðleg mót.

Í öllu falli mun minning um afrek Fishers hér í Reykjavík lifa um ókomin ár, þar sem hann velti ekki aðeins heimsmeistara úr sessi, heldur líka ímynd heimsveldis ásamt því vekja heimsathygli á skákinni og koma Íslandi á heimskort fjölmiðla.

Afrek Fishers eiga það skilið að þeim sé haldið á lofti og Ísland eðlilegur staður til þess.