Mótmæli án markmiða?

Mikil reiði er meðal almennings í landinu vegna efnahagsástandsins og er það mjög skiljanlegt, þar sem margir hafa tapað miklu fé og/eða atvinnu eða í besta falli verða fyrir lífskjaraskerðingu eingögnu í besta falli.

Hins vegar hafa mótmælin hingað til verið hálf marklaus. Þau hafa beinst að einstökum ráðherrum, ríkisstjórninni í heild sinni eða jafnvel Alþingi öllu. Eins hafa einstakir emættismenn fengið heyra það svo og náttúrulega útrásarvíkingarnir.

Það er ljóst að efnahagskreppan er engum einum að kenna, hvorki einstaklingi, hópi eða jafnvel ekki einu sinni Íslendingum og þar að leiðandi hefur gengið illa að "fókusera" mótmælin.

Til að mótmæli séu árangursrík, þurfa þau að vera markviss og beinast að tilteknu "skotmarki" og hafa markmið. Þangað til, verða mótmælin tilviljunarkenndur reiðiútrásarleikur sem bitnar á einhverjum fyrir rest, sennilega fylgi stjórnarflokkanna, en hver verður árangurinn? 

Athugasemdir

[Heiðar Birnir, 11.1.2009 kl. 18:49]

Sæll Jónas.

Eru það ekki ákveðin markmið að krefjast afsagnar ráðherra, ríkisstjórnarinnar, stjórnar seðlabankans og FME?  Ég myndi telja þetta vera frekar skýr markmið og mótmælunum beint gegn ákveðnum "skotmörkum".  Þetta bitnar, sjálfsagt fyrir rest, á fylgi stjórnarflokkanna og er það ekki árangur?  Svo er það bónus að útrásavíkingarnir fái sinn skammt af reiðigusunni.

Ég er sammála þér að efnahagskreppan, per se, er ekki neinum einum að kenna, það heldur því enginn fram.  Ég hef að minnsta kosti ekki séð neinn með skilti sem stendur á niður með kreppuna, eða eitthvað álíka.

Kveðja, Heiðar.

[Jónas Egilsson, 11.1.2009 kl. 19:56]

Það að losna við hinn eða þennan, er ekki nema hálft dæmið og þó varla.

Hvað á að koma í staðin, það er stóra spurningin. Jú, það er allt í lagi og e.t.v. ekki óeðlilegt að krefast afsagnar hinns eða þessa. Þetta á ekki síður við málefnin. Kommúnistar vildu ekki aðeins kollvarpa þjóðfélaginu, heldur breyta því líka eftir ákv. hugmyndum - sem reyndar voru afskaplega ofbeldiskenndar - en það er annað mál.

[Heiðar Birnir, 11.1.2009 kl. 23:07]

Það að losna við þennan eða hinn er kannski ekki nema hálft dæmið, ég er sammála því, en það er þó upphafið.

Vissulega er það stór spurning hvað á að koma í staðin, kannski ekkert.  Kannski viljum við að sama liðið sitji að kjötkötlunum.  En þó ætti að kjósa og fá það á hreint hverjum fólk treystir til að ganga í verkin og vinna þau.  Það er það sem farið er fram á og það er markmiðið.

En er kommúnisminn ekki dauður.  Ég hélt að flestir væru sammála því, ja nema kannski DO?

[Jónas Egilsson, 11.1.2009 kl. 23:31]

Punkturinn var sá að það vantar skýrari fókus í þessa umræðu - hvert er endamarkið. Ef draga má líkingu við t.d. 800 m hlaup, þá er ekki nóg að hafa markmið á millitíma eftir 400 m, heldur þarf að setja sér mark um lokatíma - jafnvel þótt hann náist ekki.

Ég veit ekkert um hvort kommisminn sé dauður eða ekki, enda var það í sjáflu sér ekki málið. Það sem þeir höfðu óneitanlega var forskrift að því hvað þeir vildu losna við, fá í staðinn (draumaríkið) og síðan bjó Lenin til leiðbeiningar um það hvernig ætti að ná þessum markmiðum. Keisarastjórnin var mjög óvinsæl, en menn voru einfaldlega ekki búnir að ímynda sér það sem gera þurfti til að ná markmiðunum, fyrr en Lenin kom með leiðbeiningarnar og ekki síst hvatninguna.

Þessi umræða og aðgerðir snúast um völd og áhrif. Venjan er reyndar sú að þegar "nýjir" valdhafar komast að, batna kjör almennings ekkert - nema síður sé. En það er bara afleiðing byltinga. Við erum ekkert að tala um slíkt, er það?

[Heiðar Birnir, 12.1.2009 kl. 08:31]

Það er ekki verið að tala um blóðuga byltingu, taka upp kommúnisma eða neitt álíka.  Það er verið að fara fram á það að þeir sem beri ábyrgð axli hana og á sama tíma er farið fram á lýðræð.

Þess vegna eru markmiðið mótmælanna er mjög skýrt og fókuserað: kosningar.  Verði sama fólkið kosið aftur til valda, gott og vel, en þá er líka búið að kjósa. 

Ef við líkjum þessu við 800 metra hlaup, þá er endamarkið; fólkið sem tekur við að loknum kosningum.  Millitíminn eru; kosningarnar sjálfar.  Startið eru; mótmælin.  Ergó, markmið eru sett, en til að ná settu marki eru margir hlutir sem skipta máli og taka þarf tillit til.

[Jónas Egilsson, 12.1.2009 kl. 10:17]

Okay, málið dautt!

[Heiðar Birnir, 12.1.2009 kl. 19:58]

Steindautt.  Ættum við ekki að fara að kíkja á önd eða, þó ekki væri nema leirdúfur?

Kv. Heiðar