Dapurleg umsögn

Þessi ummæli Carl Lewis hljóta að teljast mög dapurleg. Þessi sigursælasti spretthlaupari síðari tíma ætti ekki að leggja nafn sitt við þessa umræðu, en virðist gera það af einhverjum ástæðum, því miður.

Sjálfur fékk Lewis gullið á Ólympíuleikunum 1988 eftir að upp komst um Ben Johnsson, sem einmitt vann 100 m hlaupið með svipuðum yfirburðum og Usain Bolt gerði í Beijing.

En það er ekki rétt að Bolt hafi skotið upp á sjónsviðið í ár. Hann hljóp t.d. undir 20 sek. í 200 m fyrir 4 árum síðan. Eins varð hann heimsmeistari unglinga í 200 m hlaupi fyrir sex árum síðan. Lyfjaeftirlit er mun betra en það var þegar Carl Lewis var að hlaupa og flestir hlauparar margprófaðir.

Ennfremur þykir mér Carl Lewis kasta steini úr glerhúsi, þegar hann er að dæma lyfjaeftirlit í öðrum löndum, en það er annað mál. Eins eru frjálsíþróttir sú íþróttagrein þar sem flest lyfjapróf eru gerð. T.d. voru fyrir nokkrum árum 60% allra prófa sem fram fóru utan keppni, gerð hjá frjálsíþróttafólki. Samt er hlutfall "jákvæðra" prófa ekki hærra en t.d. í knattspyrnu, eða um 0,6% allra prófa.

Aðalatriðið er að Usain Bolt hlýtur að teljast saklaus þar til sekt hans er sönnuð og því þjónar þessi yfirlýsing Carl Lewis ekki öðrum tilgangi en að kasta rýrð á íþróttina og þar með talið hann sjálfan - því miður.

Carl Lewis: Heimskulegt að draga ekki árangur Bolt í efa

Athugasemdir

[Marinó G. Njálsson, 12.9.2008 kl. 19:04]

Það má síðan minna á að fjölmargir bandarískir frjálsíþróttamenn hafa í seinni tíð ýmist viðurkennt lyfjamisnotkun eða að nöfn þeirra hafa komið upp í tengslum við BALCO hneykslið.

[Jónas Egilsson, 12.9.2008 kl. 19:47]

Þetta er hárrétt ábending varðandi Balco. En þau eru fleiri málin, t.d. Marion Jones, Gatlin, T.J. Hunter frá því fyrir Ólympíuleikana árið 2000 o.fl. Það liggur síðan fyrir að lyfjarannsóknarstofa í Indianapolis í Bandaríkjunum eyðilagðist í eldi fyrir nokkrum árum, þ.m.t. sýni sem þar voru. Ýmsar grunsemdir vöknuðu við þetta mál. Fyrir liggja upplýsingar um þar hafi verið sýni sem ekki þoldu dagsljósið, en eyðilögðust þar.

[Halldór Jóhannsson, 12.9.2008 kl. 23:38]

Held að Carl Lewis ætti bara vera slakur.Gruna hann um græsku.Finnst(fannst) að hann bendi bara á aðra,kanski til að dreyfa athyglinni frá sér....